News

खड्ड्यांचे २००० बळी

14Views

स्टार अपेक्स,स्टाफ न्यूज:-

रस्ते अपघातांमध्ये हजारो नागरिकांचे बळी जात असतानाच राज्यातील रस्त्यांवर असलेल्या खड्ड्यांनी तब्बल दोन हजार १३६ नागरिकांचे बळी घेतल्याची धक्कादायक माहिती सर्वोच्च न्यायालयात एका याचिकेच्या सुनावणीदरम्यान उघड झाली आहे. सर्वोच्च न्यायालयाच्या आदेशानुसार नेमण्यात आलेल्या उच्चस्तरीय समितीने या घटनांची गंभीर दखल घेऊन महाराष्ट्रासह आठ राज्यांचे नुकतेच कान टोचले आहेत. महाराष्ट्रात गेल्या पाच वर्षांत खड्ड्यांमुळे दोन हजार १३६ नागरिकांचा बळी गेला असून, देशात हा आकडा १५ हजारांच्या घरात आहे. पुण्यातही या पावसाळ्यात वेगवेगळ्या अपघातांमध्ये तीन नागरिकांचा खड्ड्यांमुळे मृ्त्यू झाला आहे. या पार्श्वभूमीवर राज्य सरकारने पुणे महापालिकेकडूनही सविस्तर अहवाल मागविला आहे.

नगरविकास विभागाने पुणे महापालिकेला गेल्या आठवड्यात पत्र पाठविले असून, त्यात सर्वोच्च न्यायालयाच्या आदेशानुसार नेमण्यात आलेल्या समितीचा अहवाल पाठविला आहे. निवृत्त न्यायमूर्ती राधाकृष्णन यांच्या अध्यक्षतेखाली नेमण्यात आलेल्या समितीची गेल्या महिन्यांत बैठक झाली. रस्त्यावरील खड्डे, रस्त्यांची देखभाल, रस्त्यांच्या दुरवस्थेमुळे होणारे अपघात आदीबाबत समितीने राज्यांकडून माहिती मागविली आहे. राज्य सरकारने ही सर्व माहिती स्थानिक स्वराज्य संस्थांकडून संकलित करण्यास सुरुवात केली आहे. खड्ड्यांमुळे नागरिकांच्या होणाऱ्या मृत्यूंबाबत मुंबई उच्च न्यायालय आणि सर्वोच्च न्यायालयात दाखल करण्यात आलेल्या याचिकेवर सुनावणी सुरू आहे.

सर्वोच्च न्यायालयाने २० ऑगस्ट रोजी झालेल्या सुनावणी दरम्यान खड्ड्यांमुळे होणाऱ्या मृत्यू तसेच गंभीर अपघातांबाबत तीव्र काळजी व्यक्त केली होती. या अपघातांमध्ये मृ्त्य पावणारे तसेच गंभीर जखमी होणाऱ्या नागरिकांना नुकसान भरपाई मिळाली पाहिजे तसेच या अपघातांशी निगडित असलेले सरकारी विभाग, इंजिनीअर यांना खड्ड्यांसाठी जबाबदार का धरू नये, असे मत सर्वोच्च न्यायालयाने नोंदविले आहे. या पार्श्वभूमीवर समिती नेमण्यात आली असून, या समितीला सविस्तर अहवाल सादर करण्याचे आदेश देण्यात आले आहेत. जखमी तसेच मृतांच्या नातेवाइकांना किती रक्कम नुकसान भरपाई म्हणून देण्यात यावी, याबाबतही समितीला शिफारस करण्याची सूचना करण्यात आली आहे. मुंबई उच्च न्यायालयाने १२ एप्रिल रोजी या प्रकरणी दिलेल्या निकालाचा या समितीने विचार करावा, अशीही सूचना सर्वोच्च न्यायालयाने या समितीला केली आहे.

महाराष्ट्र दुसऱ्या क्रमाकांवर

देशात खड्ड्यांमुळे बळी जाणाऱ्या नागरिकांची सर्वाधिक संख्या ही उत्तर प्रदेशात आहे. उत्तर प्रदेश येथे चार हजार ४१५ नागरिकांचा बळी गेला असून त्या खालोखाल महाराष्ट्रात खड्ड्यांमुळे बळी गेले आहेत. राज्यातही खड्ड्यांवरून चांगलेच राजकारण तापले होते. राष्ट्रवादी काँग्रेसने ‘सेल्फी विथ पॉट होल’ हे कॅम्पेन सोशल मीडियावर राबवून सत्ताधारी भारतीय जनता पक्षाला लक्ष्य करण्याचा प्रयत्न केला होता. पुणे शहरातही पावसाळ्यात खड्ड्यांची संख्या वाढल्याने महापालिकेवर टीका झाली होती. महापालिकेने तत्काळ उपाययोजना राबवून खड्डे बुजविण्याचा प्रयत्न केला.

पुण्यात खड्ड्यांचे तीन बळी

पुणे शहरात पावसाळ्यात झालेल्या वेगवेगळ्या अपघातांमध्ये तीन जणांचा खड्ड्यांमुळे मृत्यू झाला आहे. सॅलिसबरी पार्क येथे एका व्यावसायिकाचाही खड्ड्यांमुळे अपघाती मृत्यू झाला होता. कोंढवा येथे एका कॉलेज युवतीला खड्ड्यांमुळे जीव गमवावा लागला. त्यामुळे या वर्षी पुण्यात खड्ड्यांमुळे होणाऱ्या अपघातांची संख्या गेल्या वर्षीच्या तुलनेत वाढली. सर्वोच्च न्यायालयाकडून संबंधित यंत्रणा तसेच इंजिनीअरला जबाबदार धरण्यात यावे, असे मत याचिकेच्या सुनावणी दरम्यान नोंदविल्याने शहरातील रस्ते खड्डेमुक्त होतील, अशी अपेक्षा व्यक्त करण्यात येत आहे.

वर्ष मृतांची संख्या

२०१३ : २६०७

२०१४ : ३०३९

२०१५ : ३४१६

२०१६ : २३२४

२०१७ : ३५९७

एकूण : १४९३६

खड्ड्यांमुळे झालेले मृत्यू

राज्य मृतांची संख्या

उत्तर प्रदेश : ४४१५

महाराष्ट्र : २१३६

मध्य प्रदेश : १३८५

गुजरात : ८२५

पश्चिम बंगाल : ७९३

बिहार : ७७५

तमीळनाडू : ६५४

आंध्र प्रदेश : ६०५

Mehul Rahangdale
the authorMehul Rahangdale
Editor

Leave a Reply